Toysdaily 玩具日報

 找回密碼
 註冊
查看: 15753|回復: 6

[公共車] 叱咤港島的藍色之鷹 (長文, 多圖注意)

[複製鏈接] |關注本帖
發表於 12-7-2014 12:06:14 | 顯示全部樓層 |閱讀模式

(麻帆良市時報記者鹿目まどか報導)
香港雙層巴士喺 1980 年代初開始踏入 12 米三軸新年代,
自英國都城嘉慕 (Metro-Cammell Weymann) 開發出全球首兩輛 "Super Metrobus" 12 米三軸雙層巴士,
比九巴同中巴試用開始, 其他巴士製造商包括 Ailsa-Volvo、
Dennis 同 Leyland 亦先後研製出 12 米三軸雙層巴士新車,
比兩巴試用, 以求爭取更多後繼訂單。最後九巴選購左 Dennis 嘅 Dragon 同 Leyland 嘅 Olympian,
作為佢地嘅 12m 巴士主力, 至於中巴, 則與九巴嘅買車取向相背, 於 1983 - 1988 年間,
向 MCW 車廠合共訂購 82 架 "Super Metrobus" 新巴士 (ML3 - 84), 隨後於 1989 年,
中巴原本計劃向 MCW 加訂新車, 但係好景不常, 適逢 MCW 陷入財政危機而結束業務,
未能及時向 MCW 訂購新車, 但係中巴喺 1982 年由 Dennis 接收嘅兩架 Condor 樣辦車 (DL1 同2),
再加上中巴亦有同廠出品嘅兩軸雙層巴士 --Dominator 喺車隊服役當中,
佢地嘅性能同運作表現亦令中巴感到滿意, 於是中巴亦不作他選,
向 Dennis 訂購 46 架 Condor 12m 新車 (DL3-48), 並且喺 1989 - 90 年間投入服務。

Dennis Condor 同九巴使用嘅 Dragon 一樣, 都係由同廠出品嘅兩軸雙層巴士 --
Dominator 引申而來, 成為 Dominator 6x2, 但係應兩巴唔同嘅要求而作出分野,
除左名字唔同之外, Dennis Condor 12m 嘅車身亦使用雙門設計,
有別於九巴當時選用嘅三車門規格。呢批巴士使用 Gardner 6LXCT 引擎,
連接 Voith DIWA D851 三前速自動波箱, 佢地所配上嘅 Duple Metsec 車身,
外貌同九巴嘅 Dragon 12m 幾乎完全一樣, 而且亦配備車廂抽風系統,
停車時會由車外抽風進入車廂內部, 令車廂內空氣流通。
由於佢地擁有高載客量 (上層 72, 下層 35 加企位 60 合共 167 人),
所以常見於海隧線, 例如紅隧線 102、 111、 112 同 116 同東隧線 601 等路線,
亦會喺港島區路線, 例如 8號、42 同 70 號等路線出現。
隨住新世界第一巴士 (新巴) 喺 1998 年 9 月 1 日開始接管港島區 88 條路線嘅專營權,
呢批巴士亦跟隨其他中巴同僚轉投新主人旗下, 但係由於新巴承諾喺數年內陸續淘汰非空調巴士,
呢批巴士自然亦成為被淘汰對象, 其中三架被改作訓練巴士,
其餘車輛有部份被拆解作廢鐵出售, 亦有幸運嘅被轉售回英國, 作為接送學童嘅巴士,
或者被改作開頂巴士, 作為開蓬觀光車, 例如 Big Bus, 接載遊客遊覽英國市內各地嘅景點。
時至今日, 部份被轉售英國嘅前中巴 DL 依然喺路上行走中,
只要上車細心留意, 甚至仲可以尋回昔日中巴年代服役時嘅蛛絲馬跡。

今日, 麻帆良市正式歡迎中巴 Dennis Condor 12m 巴士登場!!
身為 "九龍人" 嘅市長 Super Bus 話, 呢批全數得 40 幾架嘅 12m "兀鷹" 巴士,
雖然不及中巴嘅 Super Metrobus ,ML 嘅 80 幾架多, 更不及九巴 12 米龍嘅 190 幾架規模咁壯大,
但係同中巴 ML 一樣, 依然成日見慣見熟, 因為佢以前住紅磡,
中巴就係用呢款車作為 116 過海線嘅主力車款之一,
Super Bus 仲話, 果陣坐巴士過海, 或者喺港島區坐巴士,
都試過坐中呢款 "兀鷹" 好幾次, 佢話雖然九巴嘅 Dragon 同中巴嘅 Condor,
點睇都似係同一款車, 但係坐落去嘅感覺卻係天與地之別!
佢話因為中巴巴士嘅座椅, 多數都係以硬椅背為主,
所以就算巴士使用氣墊懸掛系統, 乘坐感依然不及九巴嘅軟墊椅背,
亦可以想像大熱天時坐住中巴兀鷹行海隧邊吹熱風加上背脊濕淋淋嘅感覺係幾咁 "舒服" 啦!
不過後來紅隧全冷, 想試下呢種硬背加熱爆嘅滋味, 已經冇可能啦,
佢仲話雖然依家喺香港已經再見唔到呢款 "兀鷹" 巴士,
但係如果有機會去英國嘅話, 不妨留意一下,
有機會見到呢款曾經喺香港留下唔少足跡嘅前中巴 "兀鷹",
喺彼方繼續背負住佢地嘅使命!

隆重歡迎! 中巴 Dennis Condor, DL11, 見參!!


今日同時收到嘅新書 -- 新加坡利蘭雙層巴士












新加坡 Atlantean 喺香港同中國大陸嘅故事, 本書亦有著墨


在下嘅 "代表車", Super Bus 嘅小名就係因為呢批巴士而替自己起嘅, 失禮啦~


最後一部利蘭生產嘅巴士, 係比新加坡巴士,
呢架末代利蘭巴士退役之後比一名巴士迷 Dave Rogers (唔係頭文字D Super Eurobeat 果個) 買回英國作私人保留,
不過中途遇到波折, 唔知問題解決左未呢...?


唔講真係唔知, 原來有批坡柴退役之後去左南非...




跟住到本文主角, 呢架中巴 Condor Ver.2 出左成年, 終於都決定入手,
Ver.1 其實都係同一架車 DL11, 而且路線亦一樣, 只係顯示嘅目的地唔同,
所以其實入 Ver.1 定 Ver.2 對我嚟講都冇乜所謂
但係亦都掙扎左好耐先至決定入手, 始終真係曾經坐過嘅車款,
無論喺細節上有一尐小錯誤, 例如 "上" "落" 嘅字體,
始終都係中巴, 都唔似九城新咁多車出,
中巴車款依家已經出得夠少, 再咁揀擇就真係乜車都唔洗玩啦...




證書編號 0200, 限量 800 架


正式落地!!
















貪得意拎個車底睇睇, 連引擎都做埋, 而且唔係單純嘅立體,
依家有部份巴士模型有可打開引擎位睇引擎,
個人覺得都唔及呢個咁正,當然如果呢架中巴 DL 都可以打開引擎位就更加正!


九巴 Dragon 與中巴 Condor,
雖然今時今日, 12m 三軸雙層巴士喺香港已經成行成市,
但係大家會唔會覺得, 唔理係巨龍定兀鷹也好,
佢地嘅車身外型依然比人一個龐然巨物嘅感覺, 甚至比今日嘅 12m 大巴更顯得龐大,
當然呢尐只係錯覺, 但係佢地嘅高載量係今日嘅新款空調雙層巴士所不能及,
卻係不爭嘅事實




來一個對比, 留意九巴嘅 Dragon 係樹脂膠車,
膠車同鐵車始終唔可以相比, 都係睇下九巴嘅 Dragon,
同中巴嘅 Condor, 喺車身細節上有乜唔同?










真車相, 姊妹車 DL22 @ 111 攝於 1994 年中環港澳碼頭




印象中多數中巴 Condor 都係有全身廣告, 冇廣告嘅始終比較少見


中巴專營權喺 1998 年 9 月 1 日易手,
中巴 Condor 亦跟隨新主人, 雖然冇左中巴標記,
但係依家有中巴嘅車身色彩, 再加上新巴嘅自家宣傳 Banner,
但係佢地喺新巴嘅服役年期不長, 最後喺 2001 年完全脫離載客行列



長文一篇, Thanks for reading.
發表於 14-7-2014 18:06:56 | 顯示全部樓層
非常同意Superbus兄的話,中巴模型比較少選擇,有少錯都會接受倒,由其是我都是最愛dennis dominator,dennis dragon 12m no a/c,所以順理成章當年也一拼購入 舊版dennis condor.很羨慕您沒有錯過乘坐condor的機會呢!,另外想問一下,以您的印象中,您乘坐condor 12m 的引擎聲和kmb的風機版接近些還是和普通12m dragon 相似些呢? 因為風機版的引擎聲是很雄壯的,而您的心水又是那一部呢?最後謝謝您分享了您名稱的由來!
 樓主| 發表於 15-7-2014 10:36:59 | 顯示全部樓層
非常同意Superbus兄的話,中巴模型比較少選擇,有少錯都會接受倒,由其是我都是最愛dennis dominator,dennis d ...
feilong 發表於 14-7-2014 18:06

印象中九巴 3N 同中巴 DL 感覺都係差唔多, 始終大家都係使用同一款引擎同波箱,
邊架車力水好有時都要睇下個車長手車係點, 中巴果尐就唔洗講,
就連一架有成廿年車齡嘅假寶 LX 都可以舞到掂過舞龍嘅時候,
相比之下比假寶年輕得多嘅 Condor 就更加爽到唔恨!

始終自己係九龍人, 對得九巴尐車多, 對九巴感情多D係必然嘅,
特別係以前住紅磡, 好多時都會坐 6C 出旺或者去深水,
當時 6C 就係以 12米龍 (3N) 掛帥, 個人就比較鍾意有風機果批,
因為停車果陣就會有風吹入嚟, 好似有 "冷氣" 咁,
當然就同今日果尐正宗冷氣車嘅冷氣完全係兩回事啦!
不過中巴嘅車隊亦有佢獨特之處, 規格亦有唔同,
中巴 DL 其實都好特別, 更何況自己又坐過, 點都有感情~
發表於 15-7-2014 18:10:51 | 顯示全部樓層
"始終自己係九龍人, 對得九巴尐車多, 對九巴感情多D係必然嘅",我都覺得係呢,而我以前就是荃灣人,乘坐3n dragon 是小四,五時的事,是多數於假日家人帶我乘坐48號往沙田吃飯才有機會呢,我記得當時48線主力是12m leyland 及 12m 3n, 如果是leyland的話,我會叫家人等下一班車,希望會是3n,那是我最開心的日子呢,而我之所以喜愛風機3n, 就是有一次遇到一班車上約30%滿,全程車長都將部車揸到快過風,(我要揸緊扶手),當然冇車皇benz快,可能11m同12m 不能這樣比較,但那次3n高速掟彎都好凌厲,所以一坐難忘,當然也有次爆滿(下層水塘位企滿),在上斜位上客,開車唔夠力有少許後溜,(好驚又好好笑),但無改我對巨龍的鍾愛.
""當時 6C 就係以 12米龍 (3N) 掛帥, 個人就比較鍾意有風機果批,
因為停車果陣就會有風吹入嚟, 好似有 "冷氣" 咁,
當然就同今日果尐正宗冷氣車嘅冷氣完全係兩回事啦!""我就係覺得佢e下真的很特別呢,但我爬文時發覺只有中期一批是風機版,之後又是普通版,有d唔明?SUPERBUS兄有否消息呢?
不過中巴嘅車隊亦有佢獨特之處, 規格亦有唔同,
""中巴 DL 其實都好特別, 更何況自己又坐過, 點都有感情~""其實我知 DL 身為中巴8大猛禽應該很特別的,也略為爬過文,但也希望您分享下您的觀感,因我無緣,一部都未乘坐過,其待您的分享,THANKS A LOT!!!
 樓主| 發表於 17-7-2014 12:25:37 | 顯示全部樓層
12m 版 Olympian 最後果批都係冇風機嘅, 至於點解會有呢個安排, 真係不得而知...

中巴八大禽獸係指 DL1 同 2 (Dennis Condor 12m 樣辦車, 其中 DL1 係 Duple Metesc 車身, DL2 係 Alexander 車身)
, DD1 (Dennis Dominator 10.1m 長陣, 亦係全港唯一一架長陣版 Dominator),
AL1 同 2 (Ailsa-Volvo B55-10), BR1 同 2 (ECW 車身 Leyland Olympian, 其中 BR1 係 9.5m 短陣, BR2 係 10.3m 長陣) 同埋 TC1 (Leyland Titan 客車, 亦係唯一一架出口海外嘅 Titan 巴士)
DL3 之後嘅 Condor 係量產版, 所以唔係屬於中巴八大禽獸之列,
同埋 DL1同 2 同量產版其中一個最大分別, 係量產版有較高嘅駕駛座
發表於 19-7-2014 17:21:45 | 顯示全部樓層
l see, thanks,原來DL1,2才列入八大,謝指正及一系列的資料,另外利蘭書封面部利蘭都好有形,愈睇愈靚.
發表於 23-7-2014 15:23:29 | 顯示全部樓層
中巴d色e+睇愈來愈有味道~~~~~~~~~~
您需要登錄後才可以回帖 登錄 | 註冊

本版積分規則

Archiver|手機版|Toysdaily 玩具日報

GMT+8, 19-4-2021 07:06 AM , Processed in 0.027854 second(s), 20 queries .

Powered by Discuz! X3.2

© 2001-2013 Comsenz Inc.

討論區聲明:本討論區是以即時上載留言的方式運作,Toysdaily玩具日報討論區對所有留言的真實性、完整性及立場等,不負任何法律責任。而一切留言之言論只代表 留言者個人意見,並非本網站之立場,用戶不完全信賴內容,並應自行判斷內容之真實性。於有關情形下,用戶應尋求專業意見(如涉及醫療、法律或投資等問題)。由於本討論區受到「即時上載留言」運作方式所規限,故能完全監察所有留言,若讀者發現有留言出現問題,請聯絡我們。Toysdaily玩具日報討論 區有權刪除任何留言及拒絕任何人士上載留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一 切法律權利。

快速回復 返回頂部 返回列表