Toysdaily 玩具日報

 找回密碼
 註冊
查看: 17230|回復: 38

[個人收藏] Neca 1/4 Iron Man Mark VII 真正戰損 之 求人不如求己~~ (**加新圖**)

[複製鏈接] |關注本帖
發表於 17-1-2014 00:59:13 | 顯示全部樓層 |閱讀模式
本帖最後由 kevchan1103 於 19-1-2014 12:37 AM 編輯

是咁的,個標題唔係想話比大家聽我自改/Repaint左隻18" Iron Man MKVII,而係我真係入左隻獨一無二既"戰損"版,隻Iron Man真係打到無左件手甲,中左sad中之sad - 缺件!!





本身一直都想買隻Mark VII (咩廠都好),但又無錢玩HT,山口個隻又麻麻地,figma個隻直情無左影。有見近日呢隻吳耀漢跌價,又見可以配番個第三方發光頭,於是就入左手,點知一開就咁......
試過巢過晒個盒,又肯定無跌,而且我見個個位已經上晒色,仲掃左少少黑色戰損痕,加上對比左手,個件係黐實到點大力mung都mung唔到,所以無可能係我整甩,我懷疑生產/出廠時已經無左件件。真係六合彩又唔見我中...
個刻真係超sad,因為換左個頭成隻野是幾靚仔的,少咁忽肉確實可惜。試過問過舖頭,佢話無辦法,小舖一間,我都唔怪佢,因我都親眼睇住佢拿盒新比我的,只不過我勢估唔到o個個位會缺件,所以check時都無為意。我亦嘗試過聯繫Neca Customer Service,當然亦係唔會有回音,覆你都費事,有期望你就輸了...

手臂無左忽肉,你睇下Tony即使有頭盔戴都幾唔開心:



如果隻figure細D,或者我都會由佢,但隻野成18",鶴立雞群,真係好督眼督鼻,個心硬係有條刺。其實再買過隻都係我負擔能力範圍之內,但當初買呢隻野都係因為佢平,如果要再付出一倍金錢,實在不值。
我知道模型界有樣野叫"複件",但對我呢D毫無經驗,只玩figure既門外漢,其實同失傳左既武功無分別。於是乎我嘗試自己上網搵教學,睇左幾編,我發覺如果要正規咁做,所需既架生差唔多可以夠我買隻新figure,所以唔係好合乎經濟效益。但之後我睇到一編教用一個平靚正的方法,就係用一種叫"自由樹脂"的東西。

如是我嘗試去搵此東西,教學話十蚊店有,但我搵過無,問左幾間文具店都無,好在係模型區發問,有ching教路,最終在皆旺21樓成功買到!!

就係佢喇 - 神奇樹脂! (叮噹腔)


另外仲要有呢樣野 - 快乾AB畢地:


由於買齊料後太心急,無影到過程,但基本上就係先將自由樹脂浸滾水,要係滾水 (>80c),如果唔係件膠會唔夠軟/好快硬。然後等件膠軟左就躂上隻左手度,包實我想複個件件。



然後等15分鐘件膠冷卻變番硬,就可以mung番出來,咁個模就成左形。然後就混合適量AB筆地,盡情咁塞入個模度。由於我取不下左手件件,而個個位亦只係一面向外,所以我只係複單面:



等D畢地未全硬透,大概一兩小時,就可以取出。然後切走多餘部份。

又似似地樣喎!


試下o岩唔o岩戴先!

其實我留意到左手件件背面係有個L字,即係左右手件件唔係exactly一樣,如果用在右手上,會有D虛位,但就咁睇都OK,唔係好覺:


待畢地完全硬化,再係咁意打磨下...

真係越來越似樣喎...


最後階段當然係上色,來到呢度我反而開始驚,因為個件我都複得算滿意 (之前無諗過),如果上色先衰真係前功盡廢,但我真係唔識,咁點呢? 於是我拎住Iron Man隻手掌,去模型舖問老闆可唔可以指點下用咩油可以油番呢隻色。老闆教我要先上gaia金屬銀色,再上透明紅,我心諗 下.... 我本來諗住會有隻現成深紅色,差唔多似就算喎,橫掂件件咁細。對於極其量只係試過油四驅車既我,從來都未試過咁複雜既上色,係咪真係無隻現成紅色係差唔多,我唔知,但你問得人無理由唔信人,如是我就買左個兩隻色,加一支”慢乾”thinner (老闆話用筆上色慢乾thinner會少d筆痕)。

又係由於太心急,所以上色過程亦無影到,但真係先上銀色,待乾透再上透明紅 (大概三層,每層中間一定要先完全乾透)隻色真係幾似喎。但有點偏"令",如是我再掃番d黑色,match番d戰損,成品就係咁:


但其實有點衰左,因為太心急,未乾透就掂,所以近睇有點指模,但遠睇唔覺。

最後就係試戴儀式:
OK喎!! (Tony: 唔該晒!)


最後加AA膠固定,搞掂!!


但之後連唔識figure既老婆都話:"塊面可唔可以花D架?"。好! 一不做二不休,整花埋你塊面!!!

於是我又乾掃下黑色,掃下銀色 (呢樣我反而之前試過),於是就搞成咁:



由於反光加低清相機,實際睇落會"損"d。對比劇照,都算少少似啦:


大功告成!!! 自信心當堂番晒來,你睇Tony幾興奮~



今次雖然開頭係一個不快經歷,修補後亦不算完美。如果單計數,我買料都用了差不多成百元,加落原價度都係買貴左,但得到經驗同埋自己修補後既玩具反而有種特別意義。希望各位鐘意我今次的分享~

(2014-01-19 加圖)
正式用相機再影幾張 :







投放左咁多心機後,越睇越愛上呢隻figure了,本來差D係今年最sad一入,而家反而係(暫時)至愛。所以sad既玩具都可以係樂趣,睇你點樣去面對~ 多謝觀看~
發表於 17-1-2014 10:52:44 | 顯示全部樓層
勁呀喂
畢地係咪都可以用於補強關節? (加厚磨擦面)

我覺得你上色先至係神來之筆!
發表於 17-1-2014 11:00:47 | 顯示全部樓層
好勁...
我個隻玩咗十五分鐘斷腳
發表於 17-1-2014 11:05:52 | 顯示全部樓層
好勁!!!


我隻Ed-209都中sad
 樓主| 發表於 17-1-2014 11:16:33 | 顯示全部樓層
勁呀喂
畢地係咪都可以用於補強關節? (加厚磨擦面)

我覺得你上色先至係神來之筆!
edmondphk 發表於 17-1-2014 10:52 AM

我諗理論上都得既,不過有D大工程喎,除非真係有好多虛位,如果唔係一般都係加AA膠算...
 樓主| 發表於 17-1-2014 11:18:44 | 顯示全部樓層
好勁...
我個隻玩咗十五分鐘斷腳
Assassin 發表於 17-1-2014 11:00 AM

下...唔係掛!
咁我都要小心d,話晒花左咁多心機,再爛我真係接受唔到囉...
 樓主| 發表於 17-1-2014 11:25:03 | 顯示全部樓層
好勁!!!


我隻Ed-209都中sad
mushroom 發表於 17-1-2014 11:05 AM

其實我個隻都有少少,例如左手炮身花左/有大躂膠水痕,腳本來伸長縮短係一格格既,我有一隻腳係順的。

其實sad呢樣野真係一個迷思,如果你問我我其實都真係買十隻有九隻sad(唔多唔少),但我一般都唔會太介懷。我有時都會諗,係咪我真係咁地獄黑仔王呢?定還是其實其他人都係咁,只不過又好似我咁唔出聲?
發表於 17-1-2014 12:57:54 | 顯示全部樓層
其實我個隻都有少少,例如左手炮身花左/有大躂膠水痕,腳本來伸長縮短係一格格既,我有一隻腳係順的。

...
kevchan1103 發表於 17-1-2014 11:25 AM


我就右手炮個位斜左………………店舖話可以幫我整。 不過我怕無論整好, 或 幫我換隻新, 都可能有其他問題。

我見銅鑼灣M 記的209 display,  右炮都有膠水, 可能係整過, 可見sad貨何其多。
發表於 17-1-2014 14:04:02 | 顯示全部樓層
個真人頭真係嚇親街坊.............
發表於 17-1-2014 14:17:08 | 顯示全部樓層
本帖最後由 mushroom 於 17-1-2014 02:24 PM 編輯
其實我個隻都有少少,例如左手炮身花左/有大躂膠水痕,腳本來伸長縮短係一格格既,我有一隻腳係順的。

...
kevchan1103 發表於 17-1-2014 11:25 AM


我隻 戰損ironman 在皆旺頂樓買 ,  玩具鋤你  店  買,   很好,   幫你開理check ,  所以無問題。
發表於 17-1-2014 14:49:14 | 顯示全部樓層
:71:同原裝一樣,勁
之前諗住買,但個人頭真係
想知個頭戴係邊配?
 樓主| 發表於 17-1-2014 15:18:43 | 顯示全部樓層
我隻 戰損ironman 在皆旺頂樓買 ,  玩具鋤你  店  買,   很好,   幫你開理check ,  所以無問題。
mushroom 發表於 17-1-2014 02:17 PM

我知邊間,個間都應該算係最平,不過我諗就算當時我有開盒check,都未必會留意到,因為個位其實唔係好大,就咁睇其實唔覺,我試過拎住比屋企人睇,話埋俾佢聽有一忽無左,問佢睇唔睇到係邊忽佢地都話睇唔出。我自己都係摸摸下摸到個個位有粒"的"突左出來我先發現...
 樓主| 發表於 17-1-2014 15:20:44 | 顯示全部樓層
同原裝一樣,勁
之前諗住買,但個人頭真係
想知個頭戴係邊配?
cth108 發表於 17-1-2014 02:49 PM

個頭皆旺二樓有好多iron man頭賣個間有售,二魚多
發表於 17-1-2014 16:16:55 | 顯示全部樓層
我知邊間,個間都應該算係最平,不過我諗就算當時我有開盒check,都未必會留意到,因為個位其實唔係好大, ...
kevchan1103 發表於 17-1-2014 03:18 PM


間中都見地牢賣得幾平。
發表於 18-1-2014 12:58:07 | 顯示全部樓層
c hing well done,,,,awesome work and repaint ;)
您需要登錄後才可以回帖 登錄 | 註冊

本版積分規則

Archiver|手機版|Toysdaily 玩具日報

GMT+8, 10-4-2020 03:59 AM , Processed in 0.049701 second(s), 22 queries .

Powered by Discuz! X3.2

© 2001-2013 Comsenz Inc.

討論區聲明:本討論區是以即時上載留言的方式運作,Toysdaily玩具日報討論區對所有留言的真實性、完整性及立場等,不負任何法律責任。而一切留言之言論只代表 留言者個人意見,並非本網站之立場,用戶不完全信賴內容,並應自行判斷內容之真實性。於有關情形下,用戶應尋求專業意見(如涉及醫療、法律或投資等問題)。由於本討論區受到「即時上載留言」運作方式所規限,故能完全監察所有留言,若讀者發現有留言出現問題,請聯絡我們。Toysdaily玩具日報討論 區有權刪除任何留言及拒絕任何人士上載留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一 切法律權利。

快速回復 返回頂部 返回列表