序

大膠給人的感覺是貴、罕有，有錢玩具迷的玩意。究竟香港多唔多玩具迷收藏大膠呢？今次玩具迷心聲的主角是從事貿易生意的Raymond。他擁有幾十隻罕有的大膠，而且大部份都十分新淨及齊件，究竟玩迷玩大膠要注意什麼呢？讓Raymond為大家一一解答。以下是本報記者與Raymond的訪問。

你玩了大膠多久？什麼因素使你儲貴價玩具呢？
Raymond: 其實一早都愛上大膠玩具，主要是因為情意結。玩大膠通常都係我地30幾歲左右的人；細過睇人玩冇得玩，大了當然想買返。大膠古典味重，而且大隻又抵玩，真是我們這班年紀玩家的夢幻玩具。記得97前時常去188，當時有間鋪好多大膠，不過去到都係得個" 睇" 字，隻隻的價都要過萬。怎料97年unifive突然出返鐵甲萬能俠1、2號及金剛的大膠，D人驚之後的都會復刻個個將手上的大膠平好多放出黎，就係咁我能夠以合理價買到我心愛的大膠。之後不斷在日本yahoo及托朋友在日本找，結果就搵了現在這麼多。到2000年大膠的價開始穩定，而2003年狂升，到2004年可說是高峰。現在靚的大膠價錢普遍都接近萬元。

咁你唔驚unifive又復刻其他大膠嗎？
Raymond: 當時復刻的鐵甲萬能俠我都有買，但質素與當年popy的比始終差好遠，轆又重新造過，完全兩回事。就在這時我用了2千多元入了popy的鐵甲萬能俠，把那隻unifive的都賣走了。可能由於香港唔多人識玩大膠，當時unifive大膠的銷路其實不太好。所以我想unifive唔敢斷然再復刻其他。就算現在復刻其他我都冇所謂，因我的大膠收藏全不是以抄價或高價找回來的。

在你收藏中，最貴的大膠是什麼？最平又是什麼？還有什麼正追尋中？
Raymond: 最貴是宇宙飛龍的大龍，(放了在新屋)，當年又係好好彩，在ebay竟然冇乜人同我爭，萬幾蚊就可以bid到。而家…嘿嘿…。市面最平是雷登及新三一萬能俠一號。就係因為市面這兩款大膠的數目多，通常全新靚仔四千多就可以買到，而中古冇盒的千幾就能購入到。至於我想要的.. 基本的我都算是有，但有幾隻現在仍追尋中，就是電子戰隊、太陽戰隊、太空保衛者及UFO的飛碟。

如果有網友現在想開始玩大膠，你有什麼建議？
Raymond: 講真而家D大膠的價已去到高峰，要開始玩真係唔係好時候。現在連unifive的市價都貴了好多，要玩真的要量力而為。通常玩大膠的有三種朋友，第一種追求完美，好貴好貴的都冇所謂。第二種人總之齊parts質數ok就得。第三種人就係我咁，唔齊件靚唔靚要左先，慢慢搵，執下執下砌隻靚的。好處成日有發現及買到大膠，但就成日都好忙，有野做緊。如果網友經濟負擔得起，一次買隻靚靚的都係好開心。如果想過手癮，好似我咁買下買下都好happy。

究竟市面總共出過多少隻大膠？
Raymond: 唔計bandai期後出的類似大膠外，popy都出過好多。其中大龍及UFO由於是抽獎品為最罕。此外還有bullmark的金剛小寶貝、clover的王者合体、G7，takara的金剛飛天鑽，takaroku的宇宙魔神……數落市面都有幾十款。

你除了玩大膠，家中還有很多鐵皮車，可否介紹一下？
Raymond: 由於是之前職業的緣故，家中儲了很多日本的鐵皮車。主要是ichiko出的，比較classic款。還有nomura的產品。這些廠都唔再生產鐵皮車，因此比較保值。收藏中最貴的是tomica出的一款車，這車貴在由於是香港生產的。原來好多玩具車廠曾經來過香港生產玩具車，但由於成本高及人工貴，很快便撤離香港，因此這些在香港生產的玩具車十分罕及有貴重，市價通常過萬。

筆者亦有收藏大膠的興趣，但只是寥寥數款，看過Raymond的收藏後，真是大開眼界，香港實在有很多利害的收藏家，盼能看多一點，學多一點!!!亦希望Raymond能早日達到他的願望，儲齊心中想要的大膠。