序

今次我們的訪問嘉賓是呀華(網名: BBF) ，家住荔枝角。他喜歡買各樣有趣的玩具。尤其合金、戰隊等玩具。亦有在日本yahoo bid玩具的經驗，今回小記有幸探訪華哥，真感到榮幸。

—入呀華的家看到一個長長的玩具櫃，擺滿星矢的合金，家居簡潔而美觀。家中有幾個玩具櫃，而櫃上亦滿是裝玩具的玩具盒。

電視機櫃旁有個大大的玩具櫃，內放滿很多貴重的合金，如DX金毛獅王，各款合金魂。玩具飾物櫃旁亦有一個大櫃，想不到亦滿是玩具。

以下是本報記者與呀華的訪問內容:

你玩了玩具有多久？為什麼會儲？
華: 如果要數細過已經開始玩，主要是高達模型及合金。之後停了一大輪，直至五年前，Bandai推出超力電磁俠合金魂。見靚又開始玩返。更不斷追買返以前的玩具，直至現在的模樣。

以前你玩的玩具和現在有什麼分別呢？你儲咁多玩具，邊件你又最喜歡呢？
華: 以合金為例，以前真係鐵多，份量十足。而家的比例好好多，但膠感亦較重。本人認為合金魂最正，美觀而似原型設計，可分体結合，十分有型。自已最鍾意的玩具是超獸戰隊的1號及2號機械人(超獸合体及超獸合身)，因覺得有隻獅子在胸口十分型仔。

你女友仔有否反對你儲玩具？你又點睇呢？
華: 都有架，話我時常買玩具阻汰D位。亦有成日話我。但我同佢講你想我唔買野你亦唔好買你的喜好物，她當然不能，因此大家又繼續買，嘻嘻…不過又試過一招都駛得，我買幾多錢野，買返幾多錢野俾佢。Y_Y

你好像有在日本yahoo bid玩具，可行嗎？
華: 以前就有，而家好少，原因是在日本bid玩具，計埋運費，好多時仲貴過在香港買。近年上面已少了很多好野，而且亦多了很多香港人玩。玩日本yahoo，起初選一些肯寄海外的賣家，有了好的評價後，再問其他不寄海外的賣家好多都肯寄。在日本yahoo bid玩具，亦有貨不對辦的情況。我家有兩隻超獸合体，一隻話展覽擺切品，結果3萬幾yens bid返黎，又黃又舊。反而另一隻8成新齊件，靚好多，只是2萬幾yens. 所以玩日本yahoo要睇清楚、想清楚才下bid。

你通常在那兒買玩具？一間好的玩具店要具備什麼條件呢？
華: 真係冇話在邊度買玩具，旺角、灣仔什至kwai芳都有。我買玩具通常不注重價錢，就腳就得。鍾意那件玩具，心中有個價就去買。至於好的玩具店有什麼條件？我想首先，一定要標清楚價錢，到俾錢唔好又話唔包乜，唔包乜，要加幾多錢。寧願佢寫得清清楚楚。其次，又嬲抽盒蛋D鋪開過又封返。自已抽得唔好冇野好講，但發現佢地開過又封返就真係太憤怒。最後，唔好一路睇一路跟住汰，日本D鋪成日見這情形。

呀華除了玩玩具外，家中滿是Monkichi的物品，相信他的女友仔一定很喜歡這馬騮仔。謝謝呀華的訪問，在此祝願他與女友仔早日拉埋天窗，生返個小華仔，嘻嘻!!